Storm Bert i ddod â risg llifogydd i Gymru y penwythnos hwn

Mae Cyfoeth Naturiol Cymru (CNC) yn annog pobl i fod yn barod am lifogydd y penwythnos hwn, wrth i Storm Bert ddod â glaw trwm, parhaus a gwyntoedd cryfion ledled Cymru ar ddydd Sadwrn (23 Tachwedd) ac i mewn i ddydd Sul (24 Tachwedd).

Disgwylir i’r glaw ddisgyn ledled Cymru gyfan. Gall hyn arwain at broblemau dŵr wyneb, ac achosi afonydd i godi'n gyflym - yn enwedig wrth i'r eira diweddar doddi.

Mae rhybudd melyn ar waith gan y Swyddfa Dywydd am law ar gyfer rhan fwyaf o Gymru o 6yb ddydd Sadwrn hyd at 6yb ddydd Sul.  Mae yna hefyd rhybudd gwynt melyn ar waith yn cynnwys arfordiroedd Gogledd Orllewin a Gorllewin Cymru rhwng 5yb a 7yh ddydd Sadwrn.

Mae timau ymateb i ddigwyddiadau CNC yn gweithio gydag ymatebwyr brys eraill ac awdurdodau lleol i gadarnhau bod amddiffynfeydd llifogydd mewn cyflwr da, ac yn gwneud paratoadau i gadw pobl ac eiddo'n ddiogel.

Mae pobl yn cael eu hannog i ystyried unrhyw gamau y gallai fod angen iddynt eu cymryd nawr i fod yn barod, ac i gymryd gofal ychwanegol os oes angen i chi deithio:  

• Cofrestrwch ar gyfer gwasanaeth rhybuddion llifogydd am ddim Cyfoeth Naturiol Cymru yn www.cyfoethnaturiol.cymru/llifogydd neu drwy ffonio Floodline ar 0345 988 1188. 
• Edrychwch ar y tudalennau rhybuddion llifogydd ar wefan CNC i gael negeseuon Llifogydd: Byddwch yn barod a a Rhybuddion Llifogydd lleol. Mae'r tudalennau hyn yn cael eu diweddaru bob 15 munud.  
• Meddyliwch sut y gallwch chi baratoi eich cartref a'ch busnes nawr. Symudwch bethau gwerthfawr a cherbydau i leoliad uwch a meddyliwch am bacio pecyn llifogydd. Mae gan wefan CNC amrywiaeth o wybodaeth ar sut y gall pobl baratoi ar gyfer llifogydd.  

Bydd CNC yn cyhoeddi negeseuon Llifogydd: Byddwch yn barod a Rhybuddion Llifogydd os yw afonydd yn cyrraedd lefelau penodol a bydd ein timau'n monitro lefelau 24 awr y dydd. 

Mae negeseuon llifogydd: byddwch yn barod yn golygu bod llifogydd yn bosib, mae rhybuddion llifogydd yn golygu bod disgwyl llifogydd, ac mae rhybuddion llifogydd difrifol yn golygu bod bygythiad i fywyd ac y disgwylir problemau sylweddol.

Dywedodd Katie Davies, Rheolwr Tactegol ar Ddyletswydd CNC: 

"Mae'r glaw trwm a'r gwyntoedd cryfion oherwydd Storm Bert, ynghyd â’r eira diweddar yn toddi, yn debygol o achosi trafferth ledled Cymru y penwythnos hwn. Felly rydym yn cynghori pobl i edrych ar y rhybuddion a'r hysbysiadau llifogydd a gyhoeddir yn eu hardaloedd."

"Mae gwneud yn siŵr eich bod yn gwybod sut mae'r sefyllfa lle rydych chi'n byw yn bwysig iawn. Gallwch weld beth yw lefel eich perygl llifogydd a'r rhybuddion llifogydd diweddaraf ar ein gwefan sy'n cael ei hadnewyddu bob 15 munud. Cadwch lygad ar @NatResWales ar X (arfer bod yn Twitter) am y wybodaeth ddiweddaraf a gwrandewch ar adroddiadau tywydd a newyddion lleol am fanylion unrhyw broblemau yn eich ardal.

"Mae ein timau'n gwneud popeth o fewn eu gallu i leihau'r risg i gymunedau, ond os oes llifogydd rydym am sicrhau bod pobl yn gwneud popeth o fewn eu gallu i gadw eu hunain yn ddiogel hefyd. Rydym yn annog pobl i gadw draw o afonydd sydd â llif uchel, ac i beidio gyrru neu gerdded trwy ddŵr llifogydd - mae'n aml yn ddyfnach nag y mae'n ymddangos ac yn cynnwys peryglon cudd." 

Mae negeseuon llifogydd: byddwch yn barod a rhybuddion llifogydd yn cael eu diweddaru ar wefan Cyfoeth Naturiol Cymru bob 15 munud.

Mae’r wybodaeth hefyd ar gael drwy ffonio’r llinell llifogydd ar 0345 988 1188. 

Yn ogystal ag edrych ar beryglon llifogydd a chofrestru i gael rhybuddion ar wefan CNC, gall pobl hefyd edrych ar y rhagolygon llifogydd 5 diwrnod ar gyfer ardaloedd o fewn awdurdodau lleol ledled Cymru. Gellir dod o hyd i gyngor ymarferol ynglŷn â sut i baratoi ar gyfer llifogydd, fel symud eiddo gwerthfawr i fyny'r grisiau a chadw eitemau allweddol, fel dogfennau pwysig a meddyginiaeth mewn pecyn llifogydd y gellir cael gafael arno'n hawdd.